இந்த வலைப்பதிவு & நான்

சாய் ராம் என்னுடைய பெயர். பல காலமாய் தொலைக்காட்சி நிகழ்ச்சிகளில் பணிபுரிந்து வருகிறேன். பெரும்பாலும் விஜய் டீவி நிகழ்ச்சிகள். தவிர ஜெயா டீவி, சன் நியூஸ் நிகழ்ச்சிகளுக்காக பணிபுரிந்ததும் உண்டு. தற்போது விஜய் டீவியில் ‘நடந்தது என்ன’ நிகழ்ச்சியின் இயக்குனர். கதை, கவிதைகள் எழுதும் ஆர்வமுண்டு. என்னுடைய படைப்புகளை பதிக்கவும், நடப்பு செய்திகளை பற்றி விவாதிக்கவும், சுவாரஸ்யங்களை பகிர்ந்து கொள்ளவும் இந்த வலைப்பதிவு.

இந்த வலைப்பதிவில் என்ன வாசிக்கலாம்?

• மனிதர்கள் தொடர் – இது உண்மை கதாபாத்திரங்களை புனைவின் நிறத்தில் உருமாற்றி வார்த்தைகளால் வடிவமைக்கும் முயற்சி.
• தேர்ந்தெடுக்கப்பட்ட ஐந்து கவிதைகள் – எண்ணிக்கையில் அதிகமாகிவிட்ட எனது கவிதைகளில் ஐந்தினை மட்டும் தேர்வு செய்திருக்கிறேன். பிடித்திருந்தால் பிறகு மற்ற கவிதைகளையும் படிக்கலாம்.
• உலகப்புகழ் பெற்ற புகைப்படங்கள் வரிசை – புகைப்படங்களின் கதை
• வாக்களிப்பது மட்டும் ஜனநாயகம் அல்ல – ஜனநாயகம் என்கிற கருத்தாக்கத்தை அறிய ஒரு முயற்சி. தொடர் கட்டுரைகள்.

இந்த வலைப்பதிவின் அனைத்து இடுகைகளையும் கண்டறிய உள்ளடக்கம் பார்க்கவும். வலைப்பதிவை தொடர்ந்து வாசிக்க ஓடை/மின்னஞ்சல் சந்தாவில் பதிவு செய்து கொள்ளுங்கள்.

வலைப்பதிவு தொடங்கியது எப்படி?

இணைய தொடக்க காலகட்டத்தில் யாகூ தான் மிகவும் பிரபலம். அதில் மின்னஞ்சல், செய்திகள், சேட், குரூப்ஸ், டைரக்டரி என பல அம்சங்கள் இருந்தன. அதில் ஜியோசிட்டிஸ் மிகவும் பிரபலம். உங்களுக்கென்று ஓர் இணையத்தளத்தை யாகூ சர்வரில் உருவாக்கி கொள்ளலாம். (வலைப்பதிவு அப்போது பிரபலம் கிடையாது.) நம்முடைய விருப்பத்திற்கு ஏற்றாற் போல நகரங்கள் உருவாக்கபட்டிருக்கும். அந்தந்த நகரங்களில் குடியேறி கொள்ளலாம். எனக்காக நான் ஒரு வீட்டை கட்டினேன். கட்டுமான பணியோடு நின்று போயிற்று அது. பிறகு கூகுள் பிளாக்கர் பிரபலமடைந்த சமயம் ஆங்கிலத்திலும் தமிழிலும் வலைப்பதிவுகள் தொடங்கி முதல் பதிவோடு அவை நின்று போயிற்று.

சன் நியூஸில் நிஜம் நிகழ்ச்சி தொடங்கிய சமயம், அப்போது என்னோடு பணிபுரிந்த பாலபாரதி தமிழ் பிளாக்கர்ஸ் பற்றி ஒரு தொகுப்பை செய்யலாமே என யோசனை சொன்னார். அவங்க எல்லாம் எங்க இருக்காங்க என்று கேட்டேன். பிறகு அந்த தொகுப்பு ஒளிபரப்பானது. அதே சமயம் நானும் தமிழ்மணத்தை பார்த்து பார்த்து உடனே எனக்கென்று ஒரு வலைப்பதிவை தொடங்கும் ஆசை கொண்டேன். ஏற்கெனவே தொடங்கியவை அனைத்தும் முடங்கி போனதால், கவிதைகள் எழுதுவதையாவது தொடர்ந்து செய்வோம் என்று கவிதைகளுக்கு மட்டும் வலைப்பதிவு என்கிற எண்ணத்தில் 2008-ம் ஆண்டு ஜனவரி மாதம் 29-ம் தேதி blogger-இல் செவ்வாய்க்கிழமை கவிதைகள் (http://poetry-tuesday.blogspot.com) என்கிற பெயரில் வலைப்பதிவு தொடங்கினேன்.

• எதற்காக கவிதைகளுக்கான வலைப்பதிவு? – தொடக்கப்புள்ளி

செவ்வாய்க்கிழமையன்று கவிதை பதிக்க வேண்டும் என்கிற பழக்கத்தை எனக்குள் ஏற்படுத்தி கொள்ளவே செவ்வாய்க்கிழமை கவிதைகள் என்று அப்போது வலைப்பதிவிற்கு பெயர் வைத்திருந்தேன். (இலக்கியவாதிகள் மன்னிப்பார்களாக.) இப்போது வரை என்னுடைய கவிதைகள் அனைத்தும் செவ்வாய்க்கிழமையன்று மட்டுமே பதிக்கபடுகின்றன.

இரண்டறை வருடங்கள் பிளாக்கரில் குப்பை கொட்டியதற்கு பிறகு sairams.com என்கிற இந்த முகவரிக்கு 2010-ம் ஆண்டு மே 12-ம் தேதியன்று நண்பர் ரவியின் உதவியோடு குடியேறினேன்.

நான்

• என்னுடைய டிவிட்டர் பக்கம்
• என்னுடைய நண்பர்கள்
• என்னை தொடர்பு கொள்ள

எனது வலைப்பதிவை பற்றி எழுதியவர்கள்

• “வலைப்பூ கவிதைகளில் சாய்ராமின் படைப்புகள் அவற்றின் தீவிர தேடலால் கவனிக்கத்தக்கவை ஆகின்றன, குறிப்பாக மனித இருப்பின் நெருக்கடி பற்றிய கவிதைகள்.” – அபிலாஷ் தாமரை இதழில் எனது வலைப்பதிவை பற்றி எழுதியது. விரிவான கட்டுரை அவரது வலைப்பதிவில் வாசிக்கலாம்.
• என்னுடைய தற்கொலை மேம்பாலம் கவிதைக்காக பாலா அவரது வலைப்பதிவில் வரைந்த கார்ட்டூன்.
• சுரங்கத்தினுள் 33 பேர், 68 நாட்கள் பற்றி விவசாயி வலைப்பதிவு.
• முத்துக்கமலம் வலைப்பூவில் எழுதப்பட்ட குறிப்பு.
• வலைச்சரத்தில் எனது கவிதையை பற்றி சொன்னதும் & மனிதர்கள் தொடர் பற்றி சொன்னதும்.
• ரவி சொன்னது.
• தமிழ்மணம் எனும் பிரபல தமிழ் வலைப்பதிவு திரட்டி 2009-ம் ஆண்டிற்காக நடத்திய சிறந்த இடுகைக்களுக்கான போட்டியில் ‘தலித் மக்களின் பிரச்சனைகள், மனித உரிமை, நிறவெறி தொடர்பான கட்டுரைகள்’ என்கிற பிரிவில் என்னுடைய தலித்தை கொளுத்தினார்கள் என்கிற பதிவு இரண்டாவது இடத்தை பெற்றது.

இணையத்தில் வேறிடத்தில் எனது எழுத்துகள்

• பிச்சையும் வேண்டாம்! தானமும் வேண்டாம்! – உயிரோசையில் வெளிவந்த எனது கட்டுரை.
• ஆறாம்திணையில் வெளிவந்த எனது கட்டுரைகள்

நன்றி

• என்னுடைய இடுகைகளை இணையத்தில் பதிவேற்றுவதற்கு முன்பே அவற்றை வாசித்து கருத்து சொல்லும் என்னுடைய மனைவி இளமதி.
• இந்த வலைப்பதிவினை தொடங்க உதவிய நண்பர்கள் பாலபாரதி மற்றும் ரவி
• வலைப்பதிவினை தொடர்ந்து வாசித்து வரும் நண்பர்கள்.
• இந்த பக்கத்தில் தொடக்கத்தில் இடம் பெற்றிருப்பது எனது அபிமான ஓவியரான எட்வர்ட் முன்ச் வரைந்த the scream ஓவியம்.
• வலைப்பதிவு caption ‘இருத்தலின் தாங்கவியலாத எளிமை’: Milan Kundera-வின் The unbearable lightness of being நாவல் தலைப்பின் பாதிப்பால் உருவானது.
• ரவியின் milkhost நிறுவனம் மூலமாக இந்த தளம் இயங்குகிறது.